“Mançester Siti” “Benfika”nın sağ cinah müdafiəçisini izləyir.

90plus.az xəbər verir ki, “Mançester Siti” Portuqaliya təmsilçisi “Benfika”da çıxış edən sağ cinah müdafiəçisi Amar Dediçə ciddi maraq göstərir.

Bildirilir ki, “şəhərlilər” 23 yaşlı futbolçunu yaxından izləyir. Klubun skautları Dediçlə bağlı bir neçə müsbət hesabat hazırlayaraq birbaşa baş məşqçi Pep Qvardiolaya təqdim ediblər.

Ötən yay “Benfika”ya transfer olunan Amar Dediç qısa müddətdə əsas heyətin daimi üzvünə çevrilib. Bosniyalı müdafiəçi son oyunda da meydanda 90 dəqiqə çıxış edib. Hücumlara müdafiədən aktiv qoşulması, sürəti və əks-hücumlar zamanı topu irəli daşımaq bacarığı “Mançester Siti”nin seleksiya heyətini heyran qoyub. Bu keyfiyyətlər onun taktiki baxımdan çoxşaxəli futbolçu olduğunu göstərir.

Dediçin “Benfika” ilə müqaviləsi 2030-cu ilə qədər qüvvədədir ki, bu da Portuqaliya klubuna danışıqlarda üstün mövqe qazandırır.

Mənbəyə görə, müdafiəçinin transfer qiymətinin 43–51 milyon funt sterlinq arasında olacağı gözlənilir. Bu məbləğ onun uzunmüddətli müqaviləsi və sürətli inkişafı ilə əsaslandırılır.

Qeyd: Dediç "Benfika"nın "Qarabağ"a 3-2 uduzduğu matda 90 dəqiqə forma geymişdi.