“Çelsi” klubunun sabiq sahibi Roman Abramoviç dövründə menecer qaydalarının pozulması ilə bağlı İngiltərə Futbol Federasiyası (FA) tərəfindən ittiham irəli sürülüb.

90plus.az xəbər verir ki, FA-nın açıqlamasına görə, London təmsilçisi 2009–2022-ci illərdə, xüsusən də 2010–2011 və 2015–2016 mövsümlərində ümumilikdə 74 qayda pozuntusunda günahlandırılır. Bu müddətdə klubun menecer nəzarəti, vasitəçilərlə əməkdaşlıq və futbolçulara üçüncü tərəf investisiyaları ilə bağlı qaydaları pozduğu iddia olunur.

“Çelsi”nin yeni rəhbərliyi isə bildirib ki, 30 may 2022-ci ildə sahibliyin dəyişməsindən sonra klub tam şəffaflıq prinsipi ilə fəaliyyət göstərir. Onların sözlərinə görə, bütün aidiyyəti qurumlara lazımi məlumatlar təqdim olunub və araşdırmalara dəstək verilir.

FA klubdan irəli sürülən ittihamlara cavabı 19 sentyabra qədər təqdim etməsini tələb edib.