Afrika Millətlər Kubokunda C qrupunun ikinci turu çərçivəsində Nigeriya və Tunis komandaları Mərakeşin Fes şəhərində yerləşən Fes İdman Kompleksində üz-üzə gəlib. Gərgin keçən qarşılaşmada Nigeriya 3:2 hesablı qələbə qazanaraq növbəti mərhələyə yüksəlməyi təmin edib.
90plus.az xəbər verir ki, Nigeriyanın qollarını 44-cü dəqiqədə Viktor Osimhen, 50-ci dəqiqədə Ndidi və 67-ci dəqiqədə Ademola Lukman vurub. Ademola Lukman iki qolun ötürməsini verərək matçın ən fəal oyunçularından biri olub. Viktor Osimhen isə Lukmanın qolunda assist müəllifi kimi yadda qalıb. Tunis yığmasının qolları 74-cü dəqiqədə Talbi, 87-ci dəqiqədə isə Abdi tərəfindən vurulub.
Bu nəticədən sonra Nigeriya xallarının sayını 6-ya çatdırıb və qrupda 1/8 final mərhələsinə vəsiqəni vaxtından əvvəl təmin edib. Tunis isə 3 xalla yoluna davam edir.
