Almaniyanın “Volfsburq” klubu baş məşqçi Daniel Bauer ilə əməkdaşlığa son qoyduğunu açıqlayıb.

90plus.az xəbər verir ki, komandanın son turda “Hamburq”a məğlubiyyəti 43 yaşlı mütəxəssisin istefasını sürətləndirən əsas səbəb olub. Hazırda “Volfsburq” Bundesliqada 20 xalla turnir cədvəlinin son pillələrində qərarlaşıb.

Klub rəhbərliyi yaxın vaxtlarda yeni baş məşqçinin təyin ediləcəyini bildirib. Mətbuatda komandaya rəhbərlik edə biləcək namizədlər arasında Dieter Heking və Feliks Maqatın adları çəkilir.

“Volfsburq”un idman direktoru Pirmin Şveqler qərarın asan qəbul edilmədiyini vurğulayıb:

“Bu qərarı vermək bizim üçün heç də asan olmadı. Birlikdə vəziyyəti dəyişəcəyimizə ümid edirdik. Lakin ümumi vəziyyəti analiz etdikdən sonra komandaya yeni impuls verməyin vacib olduğu qənaətinə gəldik ki, Bundesliqada yerimizi qoruya bilək”.

Klub həmçinin Daniel Bauerə həm əsas komandada, həm də akademiyada göstərdiyi uzunmüddətli fəaliyyətə görə təşəkkür edib və ona gələcək karyerasında uğurlar arzulayıb.