“Mançester Yunayted”in ABŞ-də keçiriləcək yay hazırlıq turu üçün açıqladığı 29 nəfərlik heyətə bəzi tanınmış futbolçuların daxil edilməməsi onların klubdakı gələcəyinin qeyri-müəyyən olduğunu göstərir.

90plus.az xəbər verir ki, Alexandro Qarnaço, Ceydon Sanço, Entoni və Tayrell Malasiya – baş məşqçi Ruben Amorimin “bomba dəstəsi” adlandırdığı bu dördlük qarşıdan gələn turun iştirakçıları arasında yer almayacaq. Onlar Karrinqton bazasında qalıb fərdi şəkildə məşqləri davam etdirəcəklər və yeni klublarla danışıqlar aparacaqlar.

“Qırmızı şeytanlar” 22 iyul 2025-ci il tarixində ABŞ-yə yola düşəcək və Premyer Liqa Yay Seriyası çərçivəsində “Vest Hem”, “Bornmut”, “Everton” və “Fiorentina” ilə qarşılaşacaq. Yeni transferlər - Mateuş Kunya və Dieqo Leon heyətə daxil edilib.

Heyətdən kənarlaşdırılan oyunçulara klub tərəfindən, Markus Reşford da daxil olmaqla, uzadılmış istirahət verilib.
Qeyd: Reşford artıq icarə əsasında “Barselona”ya keçib. Digər oyunçular da yay transfer pəncərəsində klubdan ayrılmaq istədiklərini bildiriblər.

Qarnaço ilə “Çelsi” və “Napoli” maraqlanır, lakin hələ rəsmi təklif yoxdur. Sanço “Yuventus”la danışıqlar aparır, Entoni isə keçmişdə uğurlu icarə dövrü keçirdiyi “Betis”ə qayıtmaq istəyir. Malasiyaya isə “Seltik” maraq göstərir.