“Real Madrid”in baş məşqçisi Alvaro Arbeloa “Valensiya”ya qarşı səfərdə qazanılan 2:0 hesablı qələbədən sonra mətbuat konfransında oyunu və futbolçularının performansını dəyərləndirib.
90plus.az xəbər verir ki, bu nəticə ilə Madrid təmsilçisi La Liqada çempionluq yarışında lider “Barselona”dan cəmi 1 xal geri qalaraq mübarizəni davam etdirir.
Mütəxəssis Mestallada oynamağın çətinliyinə toxunub:
“Mestallada oynamaq həmişə diş həkiminə getmək kimidir. Oyunun çətin olacağını bilirdik. Komanda çox ciddi və qətiyyətli çıxış etdi. Atmosfer və rəqibin ‘Real Madrid’ə qarşı həmişə yüksək motivasiyası işi çətinləşdirir. Amma oyunu düzgün idarə etdik. Kurtua demək olar ki, xilasetmə etmədi. Futbolçularım çox stabil və inamlı idi”, – deyə Arbeloa bildirib.
Alvaro Arbeloa görüşdə qolları vuran Alvaro Karreras və Kilian Mbappe haqqında da danışıb. Gənc müdafiəçi ilə bağlı o, belə deyib:
“Alvaro hücumda nə qədər istedadlı olduğunu bir daha göstərdi. İlk oyunda da ‘Valensiya’ya qarşı möhtəşəm qol vurmuşdu”.
Mbappe ilə bağlı isə baş məşqçinin fikirləri xüsusi diqqət çəkib:
“Kilian üçün artıq sifətlərə ehtiyac yoxdur. Kristiano Ronaldo kimi bir futbolçu bir vaxtlar bizə yadplanetli kimi görünürdü, amma Kilian da həmin səviyyəyə doğru irəliləyir. Onun hələ yolu var, lakin Kristianonun izindən getmək üçün bütün keyfiyyətlərə sahibdir. Niyə onu keçməsin? Əgər bunu bacara biləcək biri varsa, o da Kilian Mbappedir”.
