"Arsenal"ın müdafiəçisi Qabriel ən azı bir ay meydanlardan uzaq qalacaq, “Tottenhem” və “Çelsi” matçlarını buraxacaq.

90plus.az xəbər verir ki, “Arsenal”ın mərkəz müdafiəçisi Qabriel Maqalyaeş ən azı bir ay oynaya bilməyəcək. Bu barədə məlumatı  ESPN təsdiqləyib.

Braziliya millisinin üzvü şənbə günü Seneqalla keçirilən yoldaşlıq görüşünün ikinci hissəsində bud əzələsini zədələyib. “Arsenal”ın həkim heyəti hazırda onun vəziyyətini qiymətləndirir, lakin ilkin diaqnoza görə, müdafiəçi təxminən dörd həftə sıradan çıxıb. Sağalma prosesi gözləniləndən ləng gedərsə, bu müddət daha da uzana bilər.

Bu Mikel Arteta və komanda üçün ciddi itkidir. 27 yaşlı futbolçu bu mövsüm həm müdafiədə, həm də hücumda əla çıxış edib və bu vaxta qədər bütün Premyer Liqa və Çempionlar Liqası matçlarına start heyətdə çıxıb.

“Arsenal” bu mövsüm Premyer Liqada ən çox “quru oyun” keçirən komandadır (11 matçda 7 dəfə) və ən yaxşı müdafiə xəttinə sahibdir — Qabrielin də mühüm rol oynadığı bu seriyada komanda cəmi 5 qol buraxıb. Müdafiəçi bütün turnirlər üzrə artıq 2 qol vurub və 3 assist edib.

Qabriel önəmli qarşılaşmaları qaçıracaq: bazar günü “Tottenhem”lə Şimali London derbisini, çərşənbə günü Çempionlar Liqasında turnirin əsas matçı sayılan “Bayern” ilə görüşü və növbəti həftəsonu “Çelsi”yə qarşı səfər oyununu.

Artetanın müdafiənin mərkəzində əvəzləyici kimi Pyeron İnkapye və ya Kriştian Moskeranı oynatmaq imkanları var — hər ikisi solaxaydır və Qabrielin mövqeyinə uyğun gəlir.

Bununla belə, İtaliya millisinin düşərgəsi təsdiqləyib ki, Rikardo Kalafiori zədəyə görə komandanı tərk edib. Baş məşqçi Cennaro Qattuzo bildirib:

“Bəlkə də oynaya bilərdi, amma bu nə ona, nə də ‘Arsenal’a qarşı ədalətli olmazdı.”