Bukayo Saka “Arsenal” tarixində iz qoydu – İngiltərə yığmasının ən məhsuldar “topçusu” oldu 🇬🇧⚽️

90plus.az xəbər verir ki, “Arsenal”ın ulduzu Bukayo Saka İngiltərə millisinin Uels üzərində keçirdiyi yoldaşlıq görüşündə vurduğu möhtəşəm qolla klub tarixində adını qızıl hərflərlə yazdırıb.

“Three Lions” (İngiltərə yığması) artıq Morqan Rocers və Olli Uotkinsin qolları ilə önə keçmişdi ki, 24 yaşlı Saka 20-ci dəqiqədə hesabı 3:0-a çatdırdı. O, cərimə meydançasının kənarından topu qapının uzaq “doqquzluğuna” göndərərək Karl Darlouya heç bir şans qoymadı.

Bu qol Sakanın millidə 13-cü qolu oldu və bununla o, “Arsenal” tarixində İngiltərə millisində ən çox qol vuran futbolçu adını qazandı. O, bu göstərici ilə klub əfsanəsi Kliff Bastini geridə qoydu. Bastin 1938-ci ildə millidəki son qolunu vurmuşdu.

Sakanın bu qolu həm də onun AÇ-2024-ün İsveçrəyə qarşı 1/4 final oyunundan sonra İngiltərə yığması üçün ilk qoludur. Beləcə, gənc ulduz 87 ildir qırılmayan rekordu yeniləyərək “Arsenal”ın beynəlxalq səviyyədə ən parlaq nümayəndələrindən biri kimi tarixə düşüb.