Azərbaycan millisinin baş məşqçisi Ayxan Abbasov DÇ-2026-nın seçmə mərhələsində İslandiya ilə keçiriləcək qarşılaşma öncəsi mətbuat konfransında oyuna dair fikirlərini bölüşüb.

90plus.az xəbər verir ki, mütəxəssis qarşılaşmanın hər iki komanda üçün böyük önəm daşıdığını bildirib:

“Bizi gərgin və önəmli oyun gözləyir. Rəqib üçün də vacib matç olacaq. Futbolçularıma inanıram və azarkeşlərimizdən dəstək gözləyirəm. İnanıram ki, bizi tək qoymayacaqlar. İslandiya son görüşlərdə yaxşı təsir bağışlayır. İstəyirik ki, komanda olaraq ilk matçda qeydə alınan 0:5 hesablı məğlubiyyəti yaddan çıxaraq. Sabah azarkeşlərimizi sevindirməyə çalışacağıq”.

Abbasov komandada təzyiqin olmadığını vurğulayıb:

“Hər dəfə meydana qələbə əzmi ilə çıxırıq. Komandamız təzyiq altında deyil. Əksinə, rəqib komandanın pley-offa çıxmaq şansı olduğuna görə təzyiq yaşayırlar”.

Baş məşqçi həmçinin yığmaya əcnəbi futbolçuların gəlməsinə də münasibət bildirib: 

“Şəxsi fikrimə görə, belə bir şeyin olmasının tərəfdarı deyiləm. Daha çox yerli futbolçuların heyətdə yer almasını istərdim. Azərbaycanda istedadlı futbolçular var”.

Millimiz bugün saat 21:00-da İslandiya ilə Bakıda oynayacaq.