Ayxan Abbasov: “Qalib gəlmək istəyirdik və bunu bacardıq”.

90plus.az xəbər verir ki, Azərbaycan milli komandası “FIFA Series 2026” beynəlxalq turniri çərçivəsində Mehdi Hüseynzadə adına Sumqayıt şəhər stadionunda Sent Lüsiya yığmasını 6:1 hesabı ilə məğlub edib. Oyundan sonra millimizin baş məşqçisi Ayxan Abbasov mətbuat konfransında jurnalistlərin suallarını cavablandırıb.

Baş məşqçi ilk olaraq stadiona gələn azsaylı azarkeşlərə təşəkkür edib və oyunun çətin hava şəraitində keçirildiyini bildirib:

“Belə yağışlı havada bizi tək qoymayan azarkeşlərimizə təşəkkür edirəm. Bu cür şəraitdə oynamaq ağırdır, hər iki komanda çətinlik çəkirdi. Buna baxmayaraq, futbolçuların oyuna köklənməsini və qol vurmaq istəyini gördük. Bu il ilk toplanışımız idi, heyətdə yeni oyunçular var idi. Növbəti oyuna vaxtımız azdır, amma ciddi hazırlaşırıq. Rəqib daha güclü komandadır və yaxşı nəticə qazanmaq istəyirik.”

Abbasov bildirib ki, bu oyunda əsas məqsəd futbolçuların qələbə və qol istəyini görmək idi:

“Bundan əvvəlki oyunlarımız çox ciddi rəqiblərə qarşı idi. Futbolçuların döyüşkənliyi ilə öyünürdük. Bu gün isə onların qol vurmaq və qalib gəlmək istədiyini gördük. Millinin oyunlarında nəticə çox önəmlidir. Hər xal və hər statistika vacibdir.”

Oyunda bəzi epizodlarda futbolçuların simulyasiya etməsi ilə bağlı suala isə baş məşqçi belə cavab verib:

“Bu, düzgün fikir deyil. Hava şəraitini nəzərə almaq lazımdır, meydança sürüşkən idi. Millətlər Liqasında heç bir futbolçunu itirmək istəmirik. Futbolçular bu məsələlərə diqqət etməlidirlər.”

Heyətdə çoxlu dəyişikliklərin səbəbi barədə danışan Abbasov bildirib ki, məqsəd bütün futbolçulara şans vermək olub:

“Hamıya şans vermək istəyirik. Komandada rəqabət var. Heyətdə dəyişikliklər ola bilər. Zədələr də var, bəzi futbolçular daha yaxşı formadadır. Bugünkü oyun əlavə şans idi ki, hamıya baxaq.”

Son günlər ünvanına səslənən tənqidlərə də münasibət bildirən mütəxəssis bunları deyib:

“Tənqidləri normal qarşılayıram. Hər kəs bizi bəyənməyə bilər, hərənin öz fikri var. Bu, milli komandadır və heyət açıqlananda hərənin öz versiyası olur. Bir şeyə əminəm ki, heç vaxt qərəzli qərar verməmişəm və vermərəm.”

Baş məşqçi 6:1 hesablı qələbənin rekord nəticə olduğunu bildiklərini də qeyd edib:

“Bilirdik ki, rekord ola bilər, amma futbolçulara xüsusi tapşırıq verməmişdik. Sadəcə, hücum etmək və çox qol vurmaq istəyirdik. Çox qol vurmaq sevindiricidir.”

Abbasov Sumqayıtda qazanılan qələbənin onun üçün xüsusi olduğunu da vurğulayıb və milli komandanın oyunlarının bölgələrdə keçirilməsinin tərəfdarı olduğunu bildirib.

Sonda o, növbəti oyun barədə danışıb:

“Syerra Leone ilə oyunu fərqli oynamaq istəyirik. İki oyun planımız var idi. Bu matçda bəzi futbolçulara istirahət verdik. Litva və Lixtenşteynlə oyunları da düşünürük. Son dəqiqələrdə fərqli sistemlə oynadıq və bəzi məsələləri bu oyunlarda yoxlamaq istəyirik.”