“Şamaxı” – “Qarabağ” 0:0 – Abbasovdan əzmkar çıxış, Qurbanovdan realist dəyərləndirmə gəldi.
90plus.az xəbər verir ki, Misli Premyer Liqasının 27-ci turunda “Şamaxı” doğma meydanda “Qarabağ”la qolsuz heç-heçə edib. Oyun sonrası hər iki komandanın baş məşqçisi matçı və mövsümün gedişini şərh edib.
“Şamaxı”nın baş məşqçisi Ayxan Abbasov futbolçularının mübarizəsini yüksək qiymətləndirib:
“Azarkeşlərə təşəkkür edirəm. Bilirdik ki, “Qarabağ” hər oyuna final kimi yanaşır. Futbolçularıma təşəkkür edirəm. Sona qədər vuruşdular, rəqibin son dəqiqələrdəki ciddi təzyiqinə dözə bildik. Bizim üçün hər xal vacibdir”.
O, komandanın inkişafından və sabitlikdən də danışıb:
“Futbolçularımız ilk turdan bu günə kimi maksimumu etməyə çalışırlar. Heyətimizdə gənclər var və onlar çox inkişaf ediblər. Bu tempi saxlamaq asan deyil”.
Baş məşqçi gələcəyi ilə bağlı yayılan xəbərlərə də aydınlıq gətirib:
“Bunlar gerçək deyil. ‘Şamaxı’ mənim üçün doğmadır. Burada işimi davam etdirmək istəyərdim. Klub düzgün yoldadır və bunu davam etdirmək lazımdır. İnanıram ki, düzgün qərar verəcəklər. Bəlkə də ilk dəfədir çalışdığım klubdan rahat gedirəm".
“Qarabağ”ın baş məşqçisi Qurban Qurbanov isə xal itkisini soyuqqanlı şəkildə dəyərləndirib:
“Futbolçularıma və azarkeşlərimizə təşəkkür edirəm. Qalib gələ bilməsək də, son saniyələrə kimi yaxşı mübarizə apardıq. Belə hallar olur”.
O, çempionluq mübarizəsi ilə bağlı da danışıb:
“Çoxdan təsiri olub. 10 xallıq fərq az deyil. Amma sona kimi mübarizə aparacağıq. Azarkeşlər üçün yaxşı futbol göstərmək istəyirik”.
Qurbanov həmçinin transfer və heyət məsələlərinə də toxunub:
“Komandaya yeni futbolçular cəlb etmək istəyirik. Heyəti gücləndirməyə ehtiyac var. Futbolçulara gələn təkliflərin təsiri olub, bunu danmaq olmaz. Amma bu futbolun qanunudur”.
Beləliklə, “Qarabağ” çempionluq yarışında xal itirsə də, “Şamaxı” güclü rəqib qarşısında mühüm bir xal qazanmağı bacarıb.
