DÇ-2026: Ukrayna – Azərbaycan oyunundan sonra Ayxan Abbasov: “Bəlkə də xal qazanmalı idik”.

90plus.az xəbər verir ki, Azərbaycan milli komandası bu gün DÇ-2026-nın seçmə mərhələsində növbəti matçına çıxıb. D qrupunda yer alan komandamız Polşanın Krakov şəhərində Ukrayna ilə qarşılaşıb. Gərgin keçən görüş Ukrayna yığmasının 2:1 hesablı qələbəsi ilə nəticələnib.

Matçdan sonra millimizin baş məşqçisi Ayxan Abbasov mətbuat konfransında çıxış edib və jurnalistlərin suallarını cavablandırıb.

Oyunun gedişi və nəticə haqda:

“Bilirdik ki, çox gərgin oyun olacaq. Futbolçularımızda yorğunluq var idi, amma xarakter göstərdilər. Onlara təşəkkür edirəm. Üç gündən bir böyük komandalarla oynamaq asan deyil. Biz futbolçulardan inam və rahatlıq istəmişdik, bu gün onu göstərdilər. Bəlkə də xal qazanmalı idik. Oyunun 10-15 dəqiqəsi çox çətin keçdi, Ukrayna qələbə üçün bütün gücünü ortaya qoydu. Nəriman Axundzadə o epizodu dəyərləndirsəydi, nəticə fərqli ola bilərdi. Gələcəyə nikbin baxıram, bu komandanın potensialı var. Ruh və istək olduqdan sonra nəticə gələcək. Qarşıda iki ev oyunumuz var, onlara hazırlaşacağıq və çalışacağıq ki, xallarımızın sayını artıraq”.

3 gündən bir oynamağa öyrəşmək haqda:

“Bu, uzun prosesdir. Futbolçular gənc yaşlarından bu tempə alışmalıdır. Bəlkə də çempionatda oyun sayını artırmaq lazımdır. Ukrayna ilə yaxşı mübarizə apardıq. Bəlkə ilk oyunu Ukraynaya qarşı keçirsəydik, başqa nəticə olardı. Əgər futbolçularımız 90 dəqiqə tam tempdə oynamağa öyrəşsələr, daha yaxşı nəticə verərlər. Amma inanın, bu gün hər biri əllərindən gələnin artığını etdi”.

Fransadan sonra Ukraynaya məğlubiyyət və yorğunluq məsələsi:

“Əlbəttə, futbolda öncədən heç nə demək olmaz. İslandiya ilə oyundan sonra xal qazandıq, hər kəs düşünürdü ki, uşaqlar uzaq səfərdən gəlib və yorğundurlar. Amma istək və ruh olanda bu yorğunluq hiss olunmur. Məsələn, Emin Mahmudov fiziki cəhətdən ən hazırlıqlı oyunçularımızdandır. Bəlkə gücü qalmamışdı, amma sonadək mübarizə apardı. Bütün futbolçular yorğun idilər, amma uduzmaq istəmirdilər. Bu mentalitetə öyrəşməliyik. Oyundan öncə onlara dedim ki, yorğunluğu bəhanəyə çevirməyək. Rəqib də yoldan gəlmişdi, onlar da eyni vəziyyətdə idi. Turnirin tempi bunu tələb edir”.

Komandada özgüvənin rolu:

“Əgər ruh olmazsa, ən yaxşı futbolçular belə komanda ola bilməz. Millidə çox vaxt olmur, 4-5 günə oyunlara hazırlaşırıq. Amma artıq fərq hiss olunur – ilk toplanışla ikinci arasında ciddi fərq var. Fransa ilə oyunda da bunu görmək istəyirdik, sadəcə, onlar bizə imkan vermədi. O matç uşaqlara güvən qazandırdı. Bu gün daha inamlı idilər. Əgər bu səviyyədə oynamağa davam etsək, komandanın inkişaf faizi artacaq. Məncə, daha yaxşı ola bilərik”.

Qələbə həsrəti və İslandiya ilə matç:

“İndi əsas məqsəd sistemin oturuşmasıdır. Komanda olaraq oyunumuzu formalaşdırmaq istəyirik. Rəqib nə qədər imkan verirsə, bir o qədər hücum etməyə çalışırıq. Heç kim deyə bilməz ki, hücuma çıxmırıq. Amma bu cür rəqiblərə qarşı oynamaq çətindir. İslandiya ilə oyunda ümidliyəm, azarkeş dəstəyinə çox ehtiyacımız var. Fransa və Ukrayna ilə oyunlarda fərqi hamı gördü. Biz də addım-addım artırmalıyıq. Azarkeşlərin dəstəyini hiss etsək, evdə daha dominant və istəkli olarıq.

Nəriman Axundzadə zədədən yeni dönmüşdü, Musa Qurbanlı oyuna yaxşı daxil oldu, Toral Bayramovu da qeyd edərdim. Mahir Emreli və Rüstəm Əhmədzadə formalarını bərpa etsələr, bizim üçün üstünlük olar. Abbas və Elvin də hücumda yaxşı təsir bağışladı”.

Legioner məsələsi:

“Bu suala cavab versəm, futbolçularıma qarşı haqsızlıq etmiş olaram (gülür). Amma etiraf edim, bəli, ola bilərdi. İslandiya və Farer adalarında çıxış edən 3-4 oyunçu var. Amma bu gün mənim futbolçularım pis oynamadı, onlara iradım yoxdur”.

Klubların rolu və yerli futbolçuların inkişafı:

“Bu, çox doğru mövzudur. Amma mən həm də klub məşqçisiyəm, bəzən dediklərim səhv anlaşılır. Məsələn, Şahruddin növbəti oyunu buraxacaq – o epizodda qırmızı vərəqə də ola bilərdi, amma qərarı belə qəbul etdik. Biz bir qapıçıdan asılı olmamalıyıq, digər qapıçılara da güvənməliyik.

Rüstəm Əhmədzadəni xüsusi qeyd etmək istəyirəm – “Sumqayıt”a keçəndən sonra tam fərqli futbolçuya çevrilib. Bu onu göstərir ki, futbolçular özlərinə uyğun komandada oynamalıdır. Bəziləri iddialı klublarda ehtiyatda qalmağa razıdır, bu da inkişafı əngəlləyir. Futbolçular daim oynasa, milli də bundan qazanacaq. Bu barədə rəhbərliklə də müzakirələr aparırıq. Yaralı yerimizdir, amma inanıram ki, daha yaxşı olacaq”.

Hücum problemi və qapıya zərbələr:

“Tam razıyam, qapıya zərbə olmadan xal da, qələbə də gəlmir. Amma zərbələrimiz az deyildi, sadəcə, dəqiqlik çatmadı. Bizə yaxın səviyyədə olan rəqiblərlə başabaş və hətta üstün oynaya bilərik – bunu sadəcə ümidlə demirəm, komandanın potensialına inanıram. Təbii ki, Ukrayna bizdən daha güclüdür. Amma bu gün meydanda əzmkarlıq gördük. Bəzən bu keyfiyyət belə bizdə çatışmırdı, indi isə bu ruh var. Buna görə futbolçuların mübarizəsinə və istəklərinə qiymət vermək lazımdır”. (Sportal)