Misli Premyer Liqasında cari mövsümün ən yüksək tamaşaçı göstəricisi qeydə alınıb.

90plus.az xəbər verir ki, rekord XXII turun son qarşılaşmasına təsadüf edib. Tofiq Bəhramov adına Respublika Stadionunda keçirilən “Qarabağ” – “Sabah” görüşünü (3:3) 10 min 361 azarkeş stadiondan izləyib.

Bundan əvvəlki ən yüksək göstərici XII turda qeydə alınmışdı. 21 noyabr 2025-ci ildə baş tutan “Sumqayıt” – “Qarabağ” matçını 9100 tamaşaçı izləyib. Mehdi Hüseynzadə adına Sumqayıt şəhər stadionunda oynanılan həmin qarşılaşmada qonaqlar 4:2 hesablı qələbə qazanıblar.

“Qarabağ” – “Sabah” duelindəki rəqəm təkcə bu mövsüm üçün deyil, ümumilikdə son 8 ilin ən yaxşı nəticəsidir. Daha böyük tamaşaçı sayı sonuncu dəfə 2017/18 mövsümündə qeydə alınıb. 5 noyabr 2017-ci ildə Gəncə şəhər stadionunda keçirilən XI turun “Kəpəz” – “Qarabağ” oyununu (0:2) 13 min 300 azarkeş izləyib.