“Barselona”nın futbolçuları “Spotify Kamp Nou” stadionunda “Nyukasl Yunayted”ə qarşı keçiriləcək Çempionlar Liqası matçında formalarında xüsusi inklüziv şriftlə çıxış edəcəklər.

90plus.az xəbər verir ki, bu təşəbbüs klubun fondu tərəfindən martın 21-də qeyd olunan Beynəlxalq Daun Sindromu Gününə həsr olunub.

Forma nömrələrində Daun sindromlu gənc qadın Anna Vives tərəfindən hazırlanmış unikal şrift istifadə olunacaq.

Layihə “Barselona” Fondu tərəfindən UEFA-nın Uşaqlar Fondu və “Itinerarium” Fondunun dəstəyi ilə koordinasiya olunur.

Bu, sözügedən şriftin Çempionlar Liqası matçında ilk istifadəsi olacaq. “Barselona” daha əvvəl bu şriftdən 2013-cü ildə keçirilən Joan Qamper Kuboku zamanı istifadə etmişdi.

“Anna” adlı şrift sosial inklüzivliyi təşviq etmək və intellektual məhdudiyyətlərlə bağlı maarifləndirməni artırmaq məqsədilə yaradılıb. Şrift artıq 80-dən çox ölkədə 15 milyondan çox yüklənib.