“Barselona”nın yetirməsi olan Rafinya Alkantara 32 yaşında peşəkar futbolçu karyerasını rəsmi olaraq başa vurduğunu açıqlayıb.
90plus.az xəbər verir ki, “La Masiya” akademiyasından yetişən yarımmüdafiəçi “Barselona”nın əsas komandasında bütün turnirlər daxil olmaqla 90 oyuna çıxıb, 12 qol vurub və heyətin dərinliyində mühüm rol oynayıb.
Kataloniya klubunda çıxış etdiyi dövrdə Rafinya zəngin titul kolleksiyasına sahib olub. O, “Barselona” ilə 4 dəfə La Liqa, 4 dəfə İspaniya Kuboku, 1 dəfə UEFA Çempionlar Liqası, 1 Klublararası Dünya Çempionatı, 1 UEFA Superkuboku və 2 İspaniya Superkubokunu qazanıb.
Tez-tez aldığı zədələr vaxtilə çox perspektivli hesab edilən karyerasının tam potensiala çatmasına mane olub. Buna baxmayaraq, müxtəlif məşqçilər dövründə uğurlu oyunları ilə diqqət çəkməyi bacarıb.
“Barselona”dan ayrıldıqdan sonra Rafinya “İnter”, “Selta Viqo”, PSJ, “Real Sosyedad” və “Olimpiakos” klublarında çıxış edib.
Təcrübəli futbolçunun son klubu Qətərin “Əl-Ərabi” komandası olub və o, məhz burada futbolçu karyerasına nöqtə qoyub.
