“Bayern Münhen” qapıçı mövqeyində görünməmiş böhranla üzləşib. Zədələr səbəbindən komandanın dörd əsas qapıçısı sıradan çıxıb və baş məşqçi Vensan Kompani qarşıdakı oyunlar ərəfəsində məhdud seçim qarşısında qalıb.

90plus.az xəbər verir ki, son problem “Bayer Leverkuzen”lə heç-heçə zamanı yaşanıb. Ehtiyat qapıçı Sven Ulrayx matçın sonlarında ciddi adduktor (bud) əzələsi yırtığı alıb. Sonradan aparılan tibbi müayinələr zədəni təsdiqləyib və təcrübəli qapıçının bir neçə həftə meydanlardan kənarda qalacağı bildirilib.

Bu vəziyyət Bundesliqa lideri üçün onsuz da çətin olan durumu daha da ağırlaşdırır. Komandanın kapitanı Manuel Noyer hazırda baldır zədəsini sağaltmaqla məşğuldur və milli komandaların oyunları üçün nəzərdə tutulan fasiləyədək meydana qayıtmayacağı gözlənilir. Digər ehtiyat qapıçı Yonas Urbiq isə son matçların birində aldığı beyin silkələnməsindən müalicə olunur.

Daha bir gənc qapıçı Leon Klanats da bud zədəsi səbəbindən komandasına kömək edə bilmir.

Beləliklə, “Bayern Münhen” Çempionlar Liqasında “Atalanta” ilə qarşıdakı oyunda akademiya qapıçılarına güvənmək məcburiyyətində qala bilər. Klubun yüksək qiymətləndirilən gənc istedadları – 19 yaşlı Yannis Bartl və 16 yaşlı Leonard Preskott əsas komandada debüt edə biləcək namizədlər arasında göstərilir.