UEFA Çempionlar Liqasının Liqa mərhələsinin ilk turunda “Benfika” doğma azarkeşləri önündə “Qarabağ”ı qəbul edəcək.
90plus.az xəbər verir ki, Portuqaliya klubunun baş məşqçisi Bruno Laje bu qarşılaşmadan əvvəl təşkil olunan mətbuat konfransında jurnalistlərin suallarını cavablandırıb. 49 yaşlı mütəxəssis oyunda əsas hədəflərinin üç xalı qazanmaq olduğunu vurğulayıb:
“Komanda olaraq keçən mövsüm Çempionlar Liqasında ortaya qoyduğumuz uğurlu performansı bu mövsümdə də təkrarlamaq istəyirik. Hədəfimiz qələbə qazanmaq, 3 xalı əldə etmək və azarkeşlərimizə yaddaqalan bir Avropa gecəsi bəxş etməkdir. “Benfika” kimi klublarda çalışan hər kəs yüksək səviyyəli tələblərlə üz-üzə olduğunu anlayır. Təkcə titul kifayət etmir – eyni zamanda keyfiyyətli futbol sərgiləmək də önəmlidir. Komanda daim irəliyə doğru yönəlməlidir. Müdafiə baxımından ötən mövsümkü səviyyəmizə yenidən çatmışıq və Avropanın ən yaxşı pressinq edən kollektivləri arasında yer alırıq. Hücumda isə hələ inkişaf sahələrimiz qalır. Oyunun qurulmasını arxa xəttdən başlayır, yarımmüdafiə ilə əlaqəni gücləndirir və topa nəzarət etməyə çalışırıq. Amma daha çox hərəkətlilik və qol vəziyyətləri yaratmalıyıq. Bu istiqamətdə futbolçularla mütəmadi işləyirik. İnanıram ki, sabah yaxşı oyun nümayiş etdirərək istəyimizə çatacaq və 3 xalı qazanacağıq.”
Qeyd: “Benfika” – “Qarabağ” oyunu sabah Bakı vaxtı ilə saat 23:00-da start götürəcək.
