UEFA Avropa Liqasının 2-ci təsnifat mərhələsinin ilk oyununda “Beşiktaş” evdə “Şaxtyor Donetsk” klubuna 2:4 hesabı ilə məğlub oldu. Oyundan sonra isə baş verən hadisə futboldan çox danışıldı.

90plus.az xəbər verir ki, “Beşiktaş” klubunun bir konqres üzvü “Şaxtyor Donetsk” komandasının braziliyalı futbolçusu Kevinə qarşı sosial mediada irqçi və təhqiramiz mesajlar göndərib. Kevin bu mesajları sosial media hesabında paylaşaraq gündəmə gətirib.

“Qara-ağlar” hadisəyə dərhal reaksiya verərək, rəsmi saytları vasitəsilə bu şəxsin intizam komissiyasına verildiyini açıqlayıb. Açıqlamada bildirilib:

“UEFA Avropa Liqası 2-ci təsnifat mərhələsindəki rəqibimiz ‘Şaxtyor Donetsk’in futbolçusu Kevinə ünvanlanmış irqçi və nifrət dolu mesajlar ictimaiyyətə əks olunub. Təəssüf ki, bu hadisəni törədən şəxs klubumuzun konqres üzvüdür. Bu səbəblə onun üzvlükdən çıxarılması üçün intizam araşdırması başlanılıb.”

“Beşiktaş” irqçiliyə qarşı mövqeyini təkrar açıqladı

Klub bəyanatında irqçiliyin hər növünü qınadığını vurğulayaraq əlavə edib:

“Keçmişdə buna bənzər hadisələrdə ‘Beşiktaş’ və böyük azarkeş kütləmiz irqçiliyə qarşı açıq və sərt mövqe sərgiləmişdir. İdman meydanlarından tutmuş həyatın hər sahəsində irqçiliyi qınayırıq.”