“Real Madrid”də Xabi Alonso dövründə az oyun şansı aldığı üçün gələcəyi ilə bağlı müxtəlif iddialar ortaya atılan Brahim Dias nəhayət ki, sükutu pozub və “Santyaqo Bernabeu”dan ayrılmaq niyyətində olmadığını bəyan edib.
90plus.az xəbər verir ki, 26 yaşlı Mərakeş yığmasının üzvü cari mövsümdə cəmi 13 matçda ümumilikdə 423 dəqiqə meydanda olub. O, çox zaman Arda Gülər və Franko Mastantuononun arxasında ehtiyatda qalıb.
Buna baxmayaraq, Dias millinin düşərgəsində “El Chiringuito TV”yə açıqlamasında Madrid klubuna tam sadiq olduğunu bildirib:
“Real Madrid"ə qayıdıram, dünyanın ən yaxşı klubuna. Mən həmişə burada olmaq, komandama kömək etmək və əlimdən gələni etmək istəyirəm.”
"Mançester Siti" akademiyasının yetirməsi olan yarımmüdafiəçi müqavilə məsələsinin də gündəmdə olduğunu vurğulayıb:
“Müqavilə yenilənməsi ilə bağlı nə olacağını görəcəyik.”
Kluba yaxın mənbələr — o cümlədən Fabrisio Romano — daha əvvəl tərəflərin razılığa çox yaxın olduğunu bildirmişdi. Brahimin son açıqlamaları isə narazılıq və ya yanvarda mümkün ayrılıq barədə yayılan iddialara son qoymuş sayılır.
