Mərakeş millisinin üzvü Brahim Dias AFCON 2025 turnirindən sonra “Real Madrid”in məşqlərinə qoşulub.
90plus.az xəbər verir ki, 26 yaşlı futbolçu “Kral klubu”nda özünü sübut etmək üçün əvvəlkindən daha qətiyyətlidir.
Dias turnir ərzində parlaq çıxışı ilə diqqət çəkib və 5 qol vurub. Lakin finalda Seneqal millisinə qarşı penalti zərbəsini dəqiq yerinə yetirə bilməməsi Mərakeşin məğlubiyyəti ilə nəticələnib və bu, onun uğurlu turnirini kölgədə qoyub.
Bununla belə, futbolçunun yaşadığı məyusluğu geridə qoyduğu bildirilir. Buna Mərakeş azarkeşlərinin güclü dəstəyi və çətin anlarda “Real Madrid” rəhbərliyinin ona verdiyi etimad mühüm təsir göstərib.
Mərakeşli hücumçu hazırda böyük motivasiya ilə çalışır və AFCON-dakı uğurlu çıxışını “Real Madrid”in əsas heyətində möhkəmlənmək üçün fürsətə çevirmək niyyətindədir. Hücum xəttində rəqabətin yüksək olmasına baxmayaraq, Dias özünə inanır.
Qeyd: “Real Madrid”in aşağı yaş qruplarının baş məşqçisi Alvaro Arbeloanın Brahim Diasa olan böyük rəğbəti də futbolçunun klubdakı gələcək perspektivlərinə müsbət təsir göstərə bilər.
