Misli Premyer Liqasının 33-cü turunda “Kəpəz” üzərində minimalhesablı qələbə qazanan “Neftçi” mövsümü avrokuboklara vəsiqə ilə başa vurdu.

Oyundan sonra keçirilən mətbuat konfransında paytaxt klubunun baş məşqçisi Yuri Vernidub həm gələcək planlardan, həm də transfer siyasətindən danışıb.

90plus.az xəbər verir ki, ukraynalı mütəxəssis komandanın yayda ciddi dəyişikliklərlə üzləşəcəyini gizlətməyib:

“Heyətin gücləndirilməsinə mütləq ehtiyac var. Sabahdan etibarən kimlərin komandada qalacağına, kimlərlə yolların ayrılacağına dair qərarlar qəbul ediləcək”.

Vernidub bildirib ki, qarşıdakı günlərdə klub rəhbərliyi ilə görüş keçiriləcək və Konfrans Liqası ilə bağlı planlar müzakirə olunacaq. Onun sözlərinə görə, “Neftçi” həm Avropada, həm də Premyer Liqada daha iddialı olmaq üçün keyfiyyətli transferlər etməlidir.

Təcrübəli çalışdırıcı Emil Balayevin yenidən milli komandaya çağırılmasına da münasibət bildirib. O, qolkiperin son oyunlarda yüksək səviyyədə çıxış etdiyini vurğulayıb:

“Emil son beş matçda çox inamlı oynadı və bunu milliyə dəvətlə təsdiqlədi. Amma hazırda kimin əsas qapıçı olacağını demək tezdir. Təlim-məşq toplanışından sonra qərar veriləcək”.

Baş məşqçi yerli futbolçulara xüsusi önəm verdiyini də qeyd edib. Vernidubun sözlərinə görə, seçim zamanı azərbaycanlı oyunçulara üstünlük verməyə çalışır:

“Əgər yerli və legioner futbolçunun səviyyəsi eynidirsə, mən birmənalı şəkildə yerli oyunçunu seçərəm. Çünki bu, milli komandaya da köməkdir”.

“Neftçi”nin çalışdırıcısı Azərbaycanda işləməkdən məmnun olduğunu da gizlətməyib. O, azarkeşlərin sevgisini hiss etdiyini və uzunmüddətli layihəyə açıq olduğunu bildirib:

“Bu gün atın üstündəsən, sabah düşə bilərsən. Amma mən Azərbaycanı və buradakı insanları çox sevirəm. Burada işləməkdən həqiqətən zövq alıram”.

Yuri Vernidub sonda “Neftçi”də yaradılan şəraiti yüksək qiymətləndirib və qarşıdakı mövsümdə daha güclü komanda qurmaq üçün dayanmadan çalışacaqlarını söyləyib.