Viktor Osimhen “Mançester Yunayted”dən imtina etdi – “Qalatasaray” və “Əl-Hilal” yarışda önə çıxır.

90plus.az xəbər verir ki, “Napoli”nin nigeriyalı hücumçusu Viktor Osimhen yay transfer dönəminin ən çox müzakirə edilən adlarından birinə çevrilib. “Mançester Yunayted” ulduz forvardı heyətinə qatmaq istəsə də, Osimhenin maaşında endirimi qəbul etməməsi səbəbindən bu keçid baş tutmayıb.

Avropa klubları arasında ən cəlbedici təklifin isə “Qalatasaray”dan gəldiyi bildirilir. Türkiyə mediasının tanınmış jurnalisti Yağız Sabuncuoğlunun məlumatına görə, İstanbul təmsilçisi Osimheni heyətinə qatmaq üçün ən ciddi addımları atır və danışıqların bu həftə yekunlaşması gözlənilir.

Digər tərəfdən, Səudiyyə Ərəbistanının “Əl-Hilal” klubu da hücum xəttini gücləndirmək üçün sürətli addımlar atır. Klub həm Viktor Osimhen, həm də serb hücumçu Duşan Vlahoviç ilə paralel danışıqlar aparır.

Yaxın günlərdə hər iki futbolçunun gələcəyi ilə bağlı yekun qərar veriləcəyi gözlənilir.