Mareska: “Qarabağ” çox enerjili və təşkilatlı komandadır”.

90plus.az xəbər verir ki, “Çelsi”nin baş məşqçisi Enso Mareska sabah Bakıda “Qarabağ”la keçiriləcək UEFA Çempionlar Liqasının Liqa mərhələsinin 4-cü tur oyunu öncəsi Londonda mətbuat konfransı təşkil edib.

İtaliyalı çalışdırıcı qarşılaşmanın önəmini belə dəyərləndirib:

“Bu matç bizə Çempionlar Liqasında ardıcıl üçüncü qələbəni gətirə bilər. Cümə günü səhər Londona qayıdırıq, şənbə yenə oyun var. Buna görə də bəzi rotasiyalar etmək məcburiyyətindəyik. Hazırlaşırıq və maksimum nəticə üçün çalışacağıq.”

Mareska Ağdam təmsilçisi barədə yüksək fikirlər səsləndirib:

“Qarabağ” yaxşı komandadır. “Benfika” və “Kopenhagen”i məğlub ediblər, Bilbaoda qazanmağa yaxın idilər. Çox güclü və enerjilidirlər, xüsusən də evdə daha aqressiv və intensiv oynayırlar. Uzun illər eyni məşqçi ilə çalışmaları onların oyununu daha da oturuşdurur.”

İtalyan mütəxəssis Qurban Qurbanovun fəaliyyətinə xüsusi hörmətini ifadə edib:

“Bir klubda 17 il işləmək inanılmazdır. Açığı, karyeramda belə bir nümunə görməmişəm. Bu, həqiqətən heyrətamizdir.”

Komandanın Bakıya gec gəlməsi ilə bağlı suala cavabında Mareska bərpa prosesini ön plana çıxardığını qeyd edib:

“Dünəni bərpaya sərf etdik. Burada qalmaq bizim üçün vacib idi. Enerjini toparlamaq və uçuşu nəzərə alaraq balans yaratmağa çalışırıq. İngiltərə vaxtına uyğun davranacağıq.”

Son olaraq o, matça tam konsentrasiya olduqlarını bildirib:

“Hər detal üzərində işləyirik. “Qarabağ” da bizim kimi iki qələbə qazanıb. Güclü, təşkilatlanmış komandadır. Çətin oyun olacaq.”

“Qarabağ” – “Çelsi” oyunu sabah saat 21:45-də Tofiq Bəhramov adına Respublika Stadionunda keçiriləcək.