Ceydon Sanço “Mançester Yunayted”i tərk etməyə yaxındır – 25 milyon avroya “Yuventus”a keçmək üzrədir.
90plus.az xəbər verir ki, ingilis futbolçu “Yuventus”un 25 milyon avroluq təklifini qəbul etməyə çox yaxındır. “Yunayted” artıq bu məbləğə razılıq verib və şəxsi şərtlərlə bağlı danışıqlar da sürətlə irəliləyir.
24 yaşlı vingerlə Türkiyənin “Fənərbağça” klubu da maraqlanırdı. Lakin Sanço Super Liqada oynamaq istəmədiyi üçün Joze Mourinyonun komandasının təklifini rədd edib.
İtaliyalı jurnalist Marko Jordano bildirir ki, Ceydon Sanço Premyer Liqada istədiyini göstərə bilmədiyi üçün karyerasında yeni səhifə açmaq niyyətindədir. “Yuventus”la danışıqları klubun idman direktoru Damien Komolli aparır və Sanço tərəfindən artıq müsbət siqnallar alınıb. Razılaşmanın yaxın günlərdə Komollinin Avropaya dönüşü ilə rəsmiləşəcəyi gözlənilir.
Qeyd: Sanço ötən mövsümü icarə əsasında “Çelsi”də keçirib. Orada ümumilikdə 42 oyunda iştirak edib, 5 qol vurub və 10 məhsuldar ötürmə ilə yadda qalıb. “Çelsi” mövsümün əvvəlində onu birdəfəlik transfer etməyi planlaşdırsa da, sonradan futbolçunun maaş tələbləri səbəbindən 25 milyon funtluq (təxminən 34 milyon dollar) satış maddəsini aktivləşdirməkdən imtina edib və bunun əvəzinə 5 milyon funtluq cərimə ödəməklə razılaşıb.
Xatırlatma: “Mançester Yunayted” Sançonu 2021-ci ildə “Borussiya Dortmund”dan 73 milyon funt sterlinqə (100 milyon dollar) transfer etmişdi. Hazırda onun müqaviləsinin başa çatmasına yalnız bir il qaldığından, “qırmızı şeytanlar” futbolçunu pulsuz itirməkdənsə, bu yay satmağa üstünlük verirlər.
Hər şey plana uyğun getsə, Sanço gələn həftənin sonuna qədər rəsmi şəkildə “Yuventus”un oyunçusu elan olunacaq. Bu transfer 2026 Dünya Çempionatına hazırlaşan İngiltərə millisinin üzvü üçün yeni bir başlanğıc ola bilər.
