Futbol tarixinə adını qızıl hərflərlə yazdıran argentinalı əfsanə Dieqo Maradonanın ölümü ilə bağlı məhkəmə işi prosedur pozuntusu səbəbilə ləğv edilib.
90plus.az xəbər verir ki, məhkəmə hakimi Xulieta Makintaçın məhkəmə prosesi davam edərkən “Justicia Divina” (“İlahi Ədalət”) adlı sənədli filmdə iştirak etməsi, qərəzsizlik prinsipinin pozulması kimi qiymətləndirilib. Bu səbəbdən işin hüquqi baxımdan etibarsız sayılmasına qərar verilib.
Məhkəmə sədri Maksimiliano Savarino açıqlamasında Makintaçın davranışlarının məhkəmə prosesinə ciddi zərər verdiyini vurğulayıb və işin yeni hakim heyəti ilə yenidən aparılmalı olduğunu bildirib.
Bu qərar prokurorlar, zərərçəkənlərin yaxınları və müdafiəçilər tərəfindən də dəstəklənib. Lakin yerli mətbuatın yazdığına görə, məhkəmə qərarı Maradonanın ailəsi və ictimaiyyət arasında böyük məyusluq yaradıb.
Əfsanə futbolçunun qızları Dalma və Giannina məhkəmə zalında göz yaşlarına boğulub. Maradonanın keçmiş həyat yoldaşı Veronika Oxeda isə ədalət axtarışından əl çəkməyəcəklərini bildirib.
Dalma Maradona açıqlamasında deyib:
“Bir şəxsin məsuliyyətsizliyi ucbatından məhkəmənin iki ay təxirə salınması olduqca üzücüdür. Bu, tam bir ədalətsizlikdir. Burada müzakirə edilən məsələ sənədli film çəkməyin qanuni olub-olmaması deyil, bir hakimin məhkəmə prosesi zamanı buna imkan verməsidir.”
Maradonanın ölümü
Futbolun ən böyük əfsanələrindən sayılan Dieqo Maradona 25 noyabr 2020-ci ildə Argentina Respublikasının Buenos Ayres əyalətinin Tixre şəhərində xroniki ürək çatışmazlığına bağlı kəskin ağciyər ödemi nəticəsində vəfat etmişdi.
Onun ölümündən sonra istintaq başladılmış, aralarında beyin cərrahı Leopoldu Luk və psixiatrı Agustina Kosaxovun da olduğu 7 nəfər Maradonanın ölümündə səhlənkarlıqla günahlandırılmışdı.
