“Borussiya Dortmund” futbolçuların ailə üzvlərinin komandanın paltardəyişmə otağı zonasına girişini qadağan edib.
90plus.az xəbər verir ki, bu qərar Bundesliga-nın açılış turunda “Sankt Pauli” ilə dramatik 3:3 hesablı heç-heçədən sonra yeni transfer Cob Bellingemin valideynlərinin iştirakı ilə yaşanan qalmaqallı hadisədən sonra verilib.
Məlumata görə, 19 yaşlı yarımmüdafiəçinin valideynləri – Mark və Deniz Bellingem – fasilədə oğullarının əvəzlənməsi və komandanın son dəqiqələrdə buraxdığı qollar səbəbindən klub rəsmilərinə etiraz ediblər.
Dortmund 85-ci dəqiqəyə qədər “Millerntor” stadionunda 3:1 hesabı ilə öndə olsa da, sonda iki qola mane ola bilməyib və yalnız bir xalla kifayətlənib. “Sanderlend”dən 32 milyon funt-sterlinq qarşılığında transfer olunan Cob Bundesliqadakı debütündə Niko Kovaç tərəfindən ilk hissədən sonra əvəzlənib.
“Sky Sports Germany”nin xəbərinə görə, bu qərar Bellingemin Hamburqda oğullarının debüt oyununu izləməyə gələn valideynlərini narazı salıb. Mark Bellingem – eyni zamanda Cobun məsləhətçisi – qarşılaşmadan sonra tuneldə idman direktoru Sebastyan Kel ilə emosional müzakirədə görüntülənib və həm əvəzlənmə, həm də komandanın oyunu ilə bağlı narazılığını bildirib. “Bild” yazır ki, o, Kovaçla birbaşa görüş tələb edərək narazılığını açıq şəkildə ifadə edib.
Mənbələrə görə, bəzi Dortmund futbolçuları da gərginliyi müşahidə ediblər. Həm Cobun erkən əvəzlənməsi, həm də komandanın üstünlüyünü əldən verməsi mübahisəni daha da qızışdırıb.
Hadisədən sonra Dortmund rəhbərliyi qaydaları dəyişib. İcraçı direktor Lars Rikken “Sky90: The Football Debate” verilişində təsdiqləyib ki, oxşar vəziyyətlərin təkrarlanmaması üçün ailə üzvlərinin paltardəyişmə otağına yaxın buraxılmasına son qoyulub.
