Dünya Karate Federasiyası (WKF) Azərbaycanın məşhur karateçisi Rafael Ağayevlə bağlı paylaşım edib.
90plus.az xəbər verir ki, qurumun rəsmi “Instagram” hesabında yer alan postda idmançının karyerasına və həyat yoluna diqqət çəkilib. Paylaşımda “Onun adını hər kəs tanıyır. Amma əfsanənin arxasındakı hekayəni çox az adam bilir” ifadəsi yer alıb və Rafael Ağayev haqqında aşağıdakı maraqlı faktlar qeyd olunub:
- Rafael Ağayev 4 mart 1985-ci ildə Sumqayıt şəhərində anadan olub.
- O, Şotokan üslubunda çıxış edir.
- 5 dəfə WKF üzrə dünya çempionu olub və fərdi dünya çempionatlarında ən çox qızıl medal qazanan karateçi kimi tarixə düşüb.
- İdman aləmində “Şərqin Panteri” ləqəbi ilə tanınır.
- Avropa çempionatlarında ümumilikdə 11 dəfə qızıl medal əldə edib.
- Karate ilə 7 yaşında məşğul olmağa başlayıb. Bu seçimində futbolçu olan atasının və döyüş sənətləri ilə məşğul olan qardaşlarının böyük rolu olub.
- Anası onun xarakterinin, intizamının və həyat dəyərlərinin formalaşmasında xüsusi təsir göstərib.
- Rafael Ağayev Tokio-2020 Yay Olimpiya Oyunlarında kişilər arasında kumite üzrə −75 kq çəki dərəcəsində gümüş medal qazanıb.
WKF paylaşımında Ağayevi müasir karate tarixinin ən böyük simalarından biri kimi təqdim edib.
