İspaniya La Liqasında 17-ci turun qarşılaşmasında “Real Madrid” doğma meydanda “Sevilya”nı qəbul edib. Xabi Alonsonun çalışdırdığı madridlilər matçdan 2:0 hesablı qələbə ilə ayrılaraq ili 3 xalla başa vurublar.

90plus.az xəbər verir ki, görüşə start heyətində başlayan Vinisius Junior 83-cü dəqiqədə meydanı Qonsalo Qarsiyaya təhvil verib. Məhz bu anda “Real Madrid” azarkeşləri braziliyalı futbolçunu fitə basaraq narazılıqlarını bildiriblər.

“Sevilya” ilə oyunda Vinisiusa göstərilən bu reaksiya İspaniya mətbuatında geniş müzakirə olunub. Diqqət çəkən məqamlardan biri isə futbolçunun matçdan dərhal sonra sosial şəbəkədə etdiyi dəyişiklik olub. Vinisius Junior “Real Madrid” forması ilə olan profil şəklini silərək onun yerinə Braziliya milli komandasının forması ilə olan fotosunu yerləşdirib.

Matçdan sonra keçirilən mətbuat konfransında “Real Madrid”in baş məşqçisi Xabi Alonsodan bu mövzu ilə bağlı münasibət öyrənilib. Mütəxəssis Vinisius Juniora yönələn fit səslərinə belə reaksiya verib:

“Azarkeşlər fikirlərini sərbəst şəkildə ifadə edə bilərlər. Çətin bir oyun idi və mən daha çox komandanın ümumi durumuna fokuslanıram. Soyunub-geyinmə otağında bu məsələ ümumiyyətlə müzakirə olunmadı”.

Qeyd: Vinisius Junior 2018-ci ildə “Flamenqo”dan “Real Madrid”ə transfer olunub. Braziliyalı ulduzun Madrid klubu ilə müqaviləsi 2027-ci ilə qədər qüvvədədir. İspaniya mətbuatında daha əvvəl yayılan xəbərlərdə Xabi Alonso ilə Vinisius arasında problemlərin olduğu və futbolçunun yay transfer pəncərəsində komandadan ayrıla biləcəyi iddia edilmişdi.