“Qarabağ”ın müdafiəçisi Elvin Cəfərquliyev UEFA Çempionlar Liqasının Liqa mərhələsinin 6-cı turunda Bakıda “Ayaks”la keçirilən və 2:4 hesabı ilə başa çatan oyundan sonra jurnalistlərin suallarını cavablandırarkən qarşılaşmanın ümumi mənzərəsini dəyərləndirib.

90plus.az xəbər verir ki, oyun haqqında danışan futbolçu bildirib ki, komanda nəticəyə görə çox məyusdur:

“Əslində danışılacaq çox şey yoxdur. Məğlubiyyət bizi ciddi mənada üzdü. Azarkeşlərimizin qarşısında qələbə qazanmaq istəyirdik. Bu görüş bizim üçün böyük əhəmiyyət daşıyırdı, çünki 3 xal növbəti mərhələyə şanslarımızı artıracaqdı. Oyuna yaxşı başladıq, iki qol vurduq, müəyyən anlarda üstünlük tam bizim tərəfimizdə idi. Hücumları yaxşı qururduq, topu nəzarətdə saxlayırdıq. Amma irəli çıxarkən etdiyimiz xırda səhvlər bahalı başa gəldi.

Belə səviyyəli rəqiblər ani boşluqları bağışlamır. “Ayaks”ın əks-hücumları çox təhlükəli idi və bunun nəticəsi olaraq iki qol buraxdıq. Axırdakı qollar isə artıq komandanın ruhdan düşməsinin təzahürü idi. Yenə də çalışacağıq ki, qalan iki oyunda maksimum nəticə əldə edək.”

Cəfərquliyev hesab edir ki, matçın əsas dönüş nöqtəsi rəqibin vurduğu üçüncü qol olub:

“O qoldan sonra psixoloji olaraq çətinlik yaşadıq. Dördüncü qol da həmin məyusluğun davamı idi.”

Əvəzetmələrlə bağlı sualı isə futbolçu belə cavablandırıb:

“Bu məsələlərə mən qarışa bilmərəm. Məşqçi hansı qərarı verirsə, ona hörmətlə yanaşırıq.”

Jurnalistin “2:1 öndə olduğunuz vaxt oyunu daha çox qorumaq lazım deyildimi?” sualına isə o, belə münasibət bildirib:

“Həmin dəqiqələrdə geriyə çəkilmək düzgün olmazdı. Boşluqlar müəyyən qədər normaldır, amma vacib olan ani səhvlərə yol verməməkdir.”

Qaçırılan qol epizodlarının nəticəyə böyük təsir etdiyini deyən müdafiəçi əlavə edib:

“Epizodlarımız kifayət qədər idi, amma istifadə edə bilmədik. Bu da məğlubiyyətin əsas səbəblərindən biridir.”

Sonda pley-off şansları barədə danışan Elvin Cəfərquliyev komandanın hələ də ümidini itirmədiyini vurğulayıb:

“İtirəcəyimiz bir şey yoxdur. Sonadək mübarizə aparacağıq və çalışacağıq ki, mərhələ adlamaq üçün tələb olunan nəticəni qazanaq.”