Azərbaycan milli komandasının futbolçusu Elvin Cəfərquliyev heyətdən uzaqlaşdırılıb.  

90plus.az xəbər verir ki, futbolçunun düşərgədən ayrılmasına səbəb dünən Haiti yığmasına qarşı keçirilən oyunda qırmızı vərəqə alması olub:  

"Haiti ilə beynəlxalq yoldaşlıq görüşü FIFA-nın təqvimi çərçivəsində baş tutduğundan, rəsmi oyun qaydaları burada da tətbiq olunurdu. Buna görə də Elvin Cəfərquliyev növbəti yoldaşlıq görüşündə iştirak edə bilməyəcək. O, dünənki qarşılaşmadan sonra milli komandanın heyətindən ayrılıb."

Qeyd: Elvin Cəfərquliyev Azərbaycan - Haiti matçının (0:3) 85-ci dəqiqəsində meydandan kənarlaşdırılıb. Müdafiəçi matçın türk baş hakimi ilə mübahisə edərək əvvəlcə sarı vərəqə alıb. Daha sonra isə hakimi ironik şəkildə alqışladığı üçün ikinci sarı vərəqəni görüb və nəticədə qırmızı vərəqə ilə meydanı tərk etməli olub.  

Milli komandamız növbəti oyununu martın 25-də saat 21:45-də Belarus yığmasına qarşı keçirəcək.