“Ferentsvaroş”un qapıçısı Deneş Dibus Çempionlar Liqasının təsnifat mərhələsinin pley-off raundunun ilk matçında Budapeştdə “Qarabağ”a 1:3 hesabı ilə uduzduqları oyunu dəyərləndirib.

90plus.az xəbər verir ki, “Origo”ya açıqlama verən Dibus evdəki məğlubiyyətə baxmayaraq, Bakıdakı qarşılaşmada sona qədər mübarizə aparacaqlarını bildirib:

"İkinci hissədə oyun tam fərqli oldu, rəqib üç dəfə qol vurdu. İlk hissədə də onların imkanları vardı, ancaq xoşbəxtlikdən bunu dəyərləndirə bilmədilər. Bizim də qol şansımız oldu, Levi qola çox yaxın idi. Fasiləyə üstün yollanmağı haqq etmişdik. Təəssüf ki, Bentse Etvöş zədə aldı. Onun meydandan çıxmasından sonra oyunun mərkəzinə nəzarəti əldən verdik. “Qarabağ” isə təşəbbüsü ələ keçirdi. Birinci hissədə bizdə olan üstünlüklər ikinci yarıda onların tərəfində oldu. Amma hələ heç nə bitməyib, qarşıda 90 dəqiqə var və biz təslim olmamalıyıq.

Əgər hesabı ən azı 2:3 edə bilsəydik, indi cavab oyununu böyük həyəcanla gözləyirdik. Buna görə əsas hədəfimiz əvvəlcə bir qol vurmaq, sonra isə ikinci qolu tapıb Çempionlar Liqasına düşmək uğrunda sonadək savaşmaqdır".