Braziliya A Seriyası təmsilçilərindən olan “Fluminense” 45 yaşlı təcrübəli qapıçısı Fabio ilə yeni müqavilə imzalayıb. Klub Fabionun mövcud kontraktını 2027-ci ilin dekabr ayına qədər uzadıb.
90plus.az xəbər verir ki, “Fluminense” klubunun yaydığı rəsmi açıqlamada bildirilib ki, 2026-cı ilin sonunda başa çatmalı olan müqavilə yenilənib. Açıqlamada Fabionun futbol tarixində ən çox rəsmi oyuna çıxan futbolçu olduğu və klubun əsl simvoluna çevrildiyi vurğulanıb. Qeyd edilib ki, Fabio gələn mövsüm “Fluminense” forması ilə ardıcıl beşinci mövsümünə başlayacaq.
Rekord müəllifi
Fabio avqust ayında “Fluminense”nin heyətində Cənubi Amerika Kubokunda (Sudamericana) qapını qoruyaraq karyerasında 1391-ci oyuna çıxıb. Bununla da o, ingilis qapıçı Piter Şiltonu geridə qoyaraq dünya futbolu tarixində ən çox rəsmi oyuna çıxan futbolçu adına sahib olub.
Təcrübəli qolkiper “Fluminense” ilə 2023-cü ildə Libertadores Kubokunu qazanıb. Fabio Braziliya milli komandası ilə isə 2003-cü ildə Amerika Kubokunda (Copa America) çempionluq sevinci yaşayıb.
