Türkiyə Super Liqasının 25-ci turunda “Fənərbağça” doğma meydanda “Samsunspor”u qəbul edib. Gərgin və dramatik keçən qarşılaşma İstanbul təmsilçisinin 3:2 hesablı qələbəsi ilə başa çatıb.

90plus.az xəbər verir ki, matçın hesabını 11-ci dəqiqədə qonaq komandanın hücumçusu Marius Mouandilmadji açıb. Bu qoldan cəmi 4 dəqiqə sonra “Fənərbağça” Matteo Guendouzinin dəqiq zərbəsi ilə hesabı bərabərləşdirib.

Lakin “Samsunspor” yenidən önə keçməyi bacarıb. Mouandilmadji 23-cü dəqiqədə özünün və komandasının ikinci qolunu vuraraq hesabı 2:1 edib. İlk hissə qonaq komandanın üstünlüyü ilə başa çatıb.

İkinci hissənin böyük hissəsində “Samsunspor” üstün təsir bağışlasa da, oyunun son dəqiqələri əsl dramla yadda qalıb. “Fənərbağça” 89-cu dəqiqədə Nenenin qolu ilə hesabı bərabərləşdirib.

Artırılmış vaxtın 90+5-ci dəqiqəsində isə Sidiki Cherif fərqlənərək İstanbul klubuna qələbə qazandırıb. Beləliklə, “Fənərbağça” son 6 dəqiqədə etdiyi geri dönüşlə matçı 3:2 hesabı ilə qalib başa vurub.

Matçda vurulan qollara bu cümləyə klik edərək keçid edin

Bu nəticədən sonra “Fənərbağça” xallarının sayını 57-yə çatdırıb. “Samsunspor” isə 32 xalda qalıb.

Növbəti turda “Fənərbağça” səfərdə “Fatih Karagümrük”lə qarşılaşacaq. “Samsunspor” isə öz meydanında “Kayserispor”u qəbul edəcək.