“Fənərbağça” prezidentliyinə namizəd Hakan Safidən iddialı transfer vədləri – Çalhanoğlu da siyahıdadır.

90plus.az xəbər verir ki, “Fənərbağça”da prezident seçkiləri öncəsi transfer gündəmi daha da qızışıb. Klub prezidentliyinə namizəd Hakan Safi potensial transfer hədəfləri arasında Hakan Çalhanoğlunun da yer aldığını açıqlayıb.  

Safinin təqdim etdiyi layihədə diqqət çəkən digər futbolçular isə Luis Suates, Merih Demiral və Meyson Qrinvuddur. Namizəd bu oyunçularla bağlı danışıqların aparıldığını və müəyyən razılaşmaların əldə olunduğunu bildirib.  

Bununla belə, adıçəkilən transferlərin reallaşması iki əsas şərtdən asılıdır. İlk növbədə Hakan Safinin prezident seçkilərində qalib gəlməsi lazımdır. Bundan əlavə, futbolçuların hazırkı klubları ilə yekun razılıqların əldə olunması tələb olunur.  

Digər tərəfdən, "İnter"dən Piero Ausilio Hakan Çalhanoğlunun gələcəyi ilə bağlı yayılan xəbərlərə münasibət bildirib. “İnter” rəsmisi türkiyəli yarımmüdafiəçini komandada saxlamaq istədiklərini vurğulayıb:

“Biz Çalhanoğlunu saxlamaq istəyirik. Onun qüvvədə olan müqaviləsi var və düşünmürəm ki, bu açıqlamaların hər hansı nəticəsi olacaq”.

Beləliklə, “Fənərbağça”nın iddialı transfer planları hələlik seçkilərin nəticəsindən və klublar arasında aparılacaq danışıqlardan asılı olaraq qalır.