Harri Keyn Bundesliqanı təriflədi: “Burada atmosfer inanılmazdır”.
90plus.az xəbər verir ki, “Bayern Münhen”in hücumçusu Harri Keyn Almaniya Bundesliqasında azarkeş atmosferindən məmnun qaldığını açıqlayıb. İngiltərəli forvard Almaniyadakı stadionlarda azarkeşlərin səs-küyü və ehtirasının onu xüsusilə heyran etdiyini bildirib.
Keyn Bundesliqa azarkeşləri barədə danışarkən hər oyunun xüsusi ab-havaya malik olduğunu vurğulayıb:
“Ən çox alman azarkeşlərindən təsirlənmişəm. Getdiyimiz hər stadionda onların nə qədər səsli və ehtiraslı olduqlarını görürük. Ev oyunlarında isə bizim azarkeşlər möhtəşəmdir. Bunu yaşamaqdan böyük zövq alıram, çünki burada heç vaxt atmosfersiz, darıxdırıcı oyun olmur”.
Təcrübəli hücumçu Bundesliqada çıxış etməyin ona futbol baxımından yeni üfüqlər açdığını da qeyd edib:
“Hər oyunda möhtəşəm atmosfer var. Eyni zamanda fərqli bir liqanı tanımaq da maraqlıdır. Bu, Premyer Liqadan başqa da yüksək səviyyəli çempionatların olduğunu anlamağa kömək edir, baxmayaraq ki, bir çoxları yalnız Premyer Liqanı ön planda görür. Mən bu tərəfini çox sevdim”.
Qeyd: Harri Keyn “Bayern Münhen”ə keçidindən sonra Bundesliqaya tez uyğunlaşıb.
Keyn 2025-ci ildə Bundesliqada ən çox qol vuran futbolçu olub. İngiltərəli hücumçu 31 qolla siyahıya başçılıq edib və ikinci pillədə qərarlaşan Seru Girassini 11 qol qabaqlayıb.
Cari mövsümdə 15 turdan sonra komandasının ən məhsuldar oyunçusu hesab olunan Keynin aktivində 19 qol var. Bundesliqa tarixində ilk 15 oyunda yalnız iki futbolçu daha yüksək nəticə göstərib: Harri Keynin özü 2023/24 mövsümündə və Robert Levandovski 2020/21 mövsümündə 20 qol vurmuşdu.
