“Tottenhem”in qarşıdan gələn Cənubi Koreya turu, komandanın ulduz futbolçusu Hın Min Sonun klubdakı gələcəyinə dair qeyri-müəyyənliyi daha da artırıb. Buna səbəb isə Asiya turu üzrə müqaviləyə daxil edilən “əsas oyunçu maddəsi”dir.

90plus.az xəbər verir ki, həmin maddəyə əsasən, əgər Son 3 avqustda Seulda “Nyukasl”la keçiriləcək oyunda iştirak etməzsə, “Tottenhem” Seuldakı matçdan qazanacağı məbləğin 75%-ni itirə bilər. Futbolçu komandaya qoşulub yalnız ehtiyatda qalarsa, bu halda ödəniləcək məbləğ yarıya qədər azalacaq.

Bu ciddi maliyyə riski səbəbilə Hın Min Sonun həm komanda ilə birlikdə səfərə çıxacağı, həm də Seuldakı oyunda meydana çıxacağı gözlənilir. Nəticə etibarilə, bu maddə Sonun turdan öncə satılması ehtimalını faktiki olaraq aradan qaldırıb.

Komandanın baş məşqçisi Tomas Frank futbolçunun uzunmüddətli gələcəyi ilə bağlı konkret açıqlama verməyib:

“Mən hazırkı vəziyyətə fokuslanmışam, mümkün transferlər məni narahat etmir,” – deyə o bildirib.

Səudiyyə Ərəbistanı və ABŞ klublarının maraq göstərdiyi Hın Min Sonun tur başa çatdıqdan sonra gələcəyi yenidən gündəmə gələ bilər. Hələliksə, onun “Tottenhem”də qalacağı dəqiq görünür.