2024/25 mövsümünü Çempionlar Liqası, A Seriyası, İtaliya Kuboku və İtaliya Superkubokunda uğursuz nəticələrlə başa vuran “İnter” yeni mövsüm üçün transfer çalışmalarına sürətli start verib.
90plus.az xəbər verir ki, İtaliya nəhəngi yay fasiləsində ikinci transferini də rəsmən açıqlayıb.
“İnter” Fransa təmsilçisi “Marsel”dən braziliyalı sağ cinah oyunçusu Luis Henrikeni heyətinə qatıb. Klub oyunçu ilə 5 illik müqavilə imzalayıb. Transferin maliyyə detalları da açıqlanıb – “İnter”, “Marsel” klubuna 23 milyon avro təzminat ödəyəcək.
Henrike bu mövsüm “Marsel”də ümumilikdə 35 oyuna çıxaraq 9 qol vurub, 10 məhsuldar ötürmə ilə yadda qalıb.
Luis Henrike “İnter”in yay transfer pəncərəsindəki ikinci transferidir. Klub bundan əvvəl xorvatiyalı yarımmüdafiəçi Petar Sucici “Dinamo Zaqreb”dən transfer etmişdi.
