İslandiya milli komandası DÇ-2026-nın seçmə mərhələsinin 5-ci turu çərçivəsində sabah Bakıda Azərbaycan yığması ilə qarşılaşacaq.

90plus.az xəbər verir ki, qonaq komandanın baş məşqçisi Arnar Qunnlauqsson oyun öncəsi keçirilən mətbuat konfransında jurnalistlərin suallarını cavablandırıb

Azərbaycan millisində dəyişikliklər...

– Azərbaycan yığması əvvəlki kimi eyni oyun sistemində çıxış edir. Lakin indi daha istəkli, daha nizam-intizamlı və təşkilatlanmış komandadır. Müdafiədə, keçid fazalarında və topa nəzarətdə nəzərəçarpacaq dərəcədə irəliləyiş var. Deyirlər ki, İslandiyada keçirilən qarşılaşmada Azərbaycan millisi zəif çıxış etdi, amma mən belə düşünmürəm – həmin oyunda bizim komanda yaxşı təsir bağışladı. Sabah yeni futbolçularımız da meydanda olacaq və onlar da özlərini göstərməyə çalışacaqlar. Bu heyətlə növbəti Avropa çempionatı üçün əsas komanda qurmaq niyyətindəyik.

Azərbaycan millisində fərqlənənlər...

– Hər millidə səviyyəli futbolçular olur. Konkret ad çəkmək istəmirəm, amma rəqibdə dinamik və çevik oyunçular var. Ukrayna ilə oyunda vurduqları qolu qeyd etmək olar. Yeni baş məşqçinin təsiri də komandada hiss olunur.

Fernando Santuşun istefasında island məşqçinin "rolu"...

–  Belə hal ilk dəfə olmur. Keçmişdə çalışdığım klublarda 4-5 dəfə belə hallar yaşanıb. Komanda uduzanda məsuliyyəti kimsə daşımalıdır və çox vaxt bu, baş məşqçi olur.

Azərbaycan–İslandiya oyununun favoriti...

– Əgər futbol nərdivanına baxsaq, biz bir qədər yuxarıdayıq və favorit hesab olunur. Amma futbol elə oyundur ki, bəzən favorit olmayan tərəf də qalib gələ bilər. Biz Fransaya qarşı oynayanda onlar favorit idi, amma bizim də müsbət nəticə qazanmaq şansımız vardı. Futbolda əsas məsələ rəqibə hörmətlə yanaşmaqdır. Sabah biz də ən yaxşı oyunumuzu sərgiləməliyik.