2026-cı il İspaniya Superkuboku Səudiyyə Ərəbistanında keçiriləcək və turnirdə iştirak edən dörd klub arasında rekord məbləğ — 23 milyon avro paylanacaq.
90plus.az xəbər verir ki, bu ötən illə müqayisədə 3 milyon avro artım deməkdir. Mükafat fondu “Barselona”, “Real Madrid”, “Atletiko Madrid” və “Atletik Bilbao” arasında bölüşdürüləcək.
İspaniya Futbol Federasiyasının (RFEF) məlumatına görə, turnir ümumilikdə 51,9 milyon avro gəlir gətirəcək. Bu məbləğin təxminən 28 milyon avrosu qeyri-peşəkar futbolun inkişafına yönəldiləcək.
Superkubok yanvarın 7-də start götürəcək. İlk yarımfinalda “Barselona” “Atletik Bilbao” ilə qarşılaşacaq, yanvarın 8-də isə “Real Madrid” – “Atletiko Madrid” oyunu keçiriləcək.
