İspaniyada futbol yenidən irqçilik qalmaqalı ilə gündəmə gəlib. “Real Madrid”in Kral Kubokunda “Albasete”yə 2:3 hesabı ilə məğlub olaraq turnirdən kənarlaşdığı oyunda çirkin insident yaşanıb.

90plus.az xəbər verir ki, qarşılaşma zamanı ev sahibi “Albasete” azarkeşlərindən biri “Real Madrid”in braziliyalı ulduzu Vinisius Juniora qarşı açıq-aşkar irqçi hücum edib. Həmin azarkeşin futbolçuya tərəf banan atdığı bildirilir.

Kral Kubokundakı sensasion məğlubiyyətdən daha çox, tribunadakı bu hərəkət böyük rezonans doğurub. Son illər səfər oyunlarında tez-tez irqçi təhqirlərə məruz qalan Vinisius Junior bir daha hədəfə çevrilib.

İspaniya Futbol Federasiyası və yerli hüquq-mühafizə orqanlarının stadion kameralarını araşdıraraq hadisəni törədən şəxsi müəyyənləşdirməsi gözlənilir. Qeyd olunur ki, bu olay səbəbindən “Albasete” klubunu ciddi pul cəriməsi və ya azarkeşsiz oyun cəzası gözləyə bilər.