İtaliya “A Seriyası”nın 11-ci turunda “Komo” doğma meydanda “Kalyari”ni qəbul edib. Qarşılaşma qolsuz bərabərliklə (0:0) başa çatıb və hər iki komanda meydanı 1 xalla tərk edib.

90plus.az xəbər verir ki, ev sahibi “Komo”nun hücumçusu Alvaro Morata matça start heyətində başlayıb. 

Oyunun 62-ci dəqiqəsində maraqlı an yaşanıb. Rəqibinə qarşı etdiyi kobud müdaxilədən sonra Alvaro Morata sarı vərəqə alıb. İspan hücumçu bu qərara əsəbiləşərək kənara dəyişiklik işarəsi verib və bir dəqiqə sonra yerini Anastasios Duvikasa buraxıb.

Yay transfer pəncərəsində “Qalatasaray”dan ayrılaraq “Komo”ya keçən Alvaro Morata bu mövsüm 12 oyunda iştirak edib, lakin hələlik qol sevinci yaşaya bilməyib. Təcrübəli futbolçu bu görüşlərdə yalnız 1 qol ötürməsi (assist) ilə yadda qalıb.