Doha şəhərinin ev sahibliyi etdiyi “Qatar Açıq” turnirində finalçılar müəyyənləşib. Yarımfinal mərhələsində rəqiblərini məğlub edən Karlos Alcaraz və Artur Fils həlledici görüşə vəsiqə qazanıblar.
90plus.az xəbər verir ki, son çempion Andrey Rublev ilə üz-üzə gələn Alkaras rəqibini 7-6 və 6-4 hesabı ilə məğlub edərək finala yüksəlib. İspaniyalı tennisçi karyerasında ilk dəfə Dohada final oynamaq imkanı qazanıb. O, həmçinin 2026-cı ildə ardıcıl 11-ci qələbəsini əldə edərək məğlubiyyətsiz seriyasını davam etdirib. Qeyd edək ki, Alkaras mövsümə “Australian Open” çempionu kimi başlayıb.
Yarımfinalın digər qarşılaşmasında Artur Fils turnirin 6 nömrəli səpələnmiş tennisçisi Jakub Mensiki 6-4 və 7-6 hesabı ilə üstələyərək finala adlayıb. Tur çərçivəsində beşinci finalını oynayacaq Fils də Alkaras kimi Dohada ilk dəfə titul uğrunda mübarizə aparacaq.
“Qatar Açıq”ın final görüşü 21 fevral tarixində keçiriləcək və Bakı vaxtı ilə saat 21:00-da start götürəcək. Alkaras və Fils karyeralarında ilk dəfə sərt örtüklü kortda üz-üzə gələcəklər. Onlar daha əvvəl iki dəfə torpaq örtükdə qarşılaşıblar və həmin görüşlərin hər ikisində üstünlük ispan tennisçinin tərəfində olub.
