“Real Madrid”in əfsanəsi İker Kasilyas baş məşqçi Xabi Alonsonu çətin keçən ilk 6 ayda artan tənqidlərdən müdafiə edib.

90plus.az xəbər verir ki, keçmiş kapitan bu tənqidləri “tamamilə ədalətsiz” adlandırıb və mövsümün hələ ilkin mərhələdə olduğunu xatırladaraq daha səbirli yanaşmağa çağırıb:

“Düşünürəm ki, ona edilənlər tamamilə ədalətsizdir,” — deyə Kasilyas bildirib. “O, futbolu çox yaxşı bilən bir insandır. ‘Real Madrid’də hər şey şou, söhbət və gündəm üzərində qurulub, bunu anlayıram. Amma indi dekabrdır və insanlar bunu başa düşmək istəmir.

Əgər ‘Barça’dan 12 xal geri düşsəydin, Kubokdan kənarlaşdırılsaydın, vəziyyət fərqli olardı…”

2010-cu il dünya çempionu fikrini təhsil sistemi ilə müqayisə edərək əlavə edib: “Belə şeylərə dözə bilmirəm, çünki anlaya bilmirəm. Bir az məktəblə müqayisə edirəm: övladın məktəbə gedir, qiymətlər alır, amma əsas qiymətlər iyunda verilir. Burada da vəziyyət buna bənzəyir.”