Səudiyyə Ərəbistanının “Əl Nəsr” klubunda çıxış edən dünya ulduzu Kristiano Ronaldo “Əl Fəyha” ilə keçirilən oyunun son dəqiqələrində zədələnərək meydanı ağrılar içində tərk edib.

90plus.az xəbər verir ki, 2026-cı il Dünya Çempionatına aylar qalmış baş verən bu hadisə 41 yaşlı futbolçunun karyerasındakı altıncı və son mundial arzusunu risk altına sala bilər.

Xəstəxanaya aparıldı

Mundo Deportivo nəşrinin məlumatına görə, “Əl Nəsr”in qələbəsi ilə başa çatan qarşılaşmadan sonra Ronaldo təcili tibbi müayinədən keçmək üçün xəstəxanaya aparılıb. Oyunda qaçırdığı penalti zərbəsindən sonra əhvalının aşağı olduğu görünən ulduz futbolçu ehtiyat oyunçular skamyasına gələn kimi ayağına buz qoydurub.

Bu isə zədənin ciddiliyi ilə bağlı sualları daha da artırıb.

Jorge Jesus açıqlama verdi

“Əl Nəsr”in baş məşqçisi Jorge Jesus oyunçusunda ciddi əzələ yorğunluğu müşahidə etdiklərini və rəsmi tibbi hesabatı gözlədiklərini bildirib.

Portuqaliyada narahatlıq

Portuqaliya millisinin baş məşqçisi Roberto Martinez üçün isə bu xəbər ciddi narahatlıq yaradıb. Millinin dəyişməz üzvlərindən sayılan Ronaldo üçün bu zədə təkcə liqa oyunu itkisi deyil, həm də 2026 Dünya Çempionatında iştirak ehtimalına təhlükə deməkdir.

Hazırda futbol ictimaiyyəti rəsmi tibbi nəticəni gözləyir. Ronaldonun vəziyyətinin necə olacağı isə həm “Əl Nəsr”, həm də Portuqaliya millisi üçün həlledici əhəmiyyət daşıyır.