"Real Madrid" La Liqanın yeni mövsümünə "Osasuna" üzərində qazanılan minimal hesablı ev qələbəsi ilə start verdi.
90plus.az xəbər verir ki, İngiltərə millisinin müdafiəçisi Trent Aleksander-Arnold La Liqada debütünü “Real Madrid”in “Osasuna” üzərində qazandığı qələbədə etdi.
Yayda “Liverpul”dan transfer olunan futbolçu yeni komandasında daha əvvəl Klubların Dünya Çempionatında 5 oyun keçirmiş, Xabi Alonso rəhbərliyində yarımfinala qədər çatmışdı. Lakin bu, onun “Santyaqo Bernabeu”dakı ilk liqa oyunu idi. 68-ci dəqiqədə Dani Karvaxalla əvəzlənərkən azarkeşlər ona alqışlarla hörmət göstərdilər.
Oyunun yeganə qolunu Kilian Mbappe vurdu. Fransalı hücumçu penalti zərbəsini dəqiq yerinə yetirərək qapıçı Serxio Erreranı aldatdı. Penalti isə Mbappenin cərimə meydançasında yıxılmasından sonra təyin olunmuşdu.
Keçən mövsüm Karlo Ançelotti ilə ikinci yeri tutan “Real Madrid” bu dəfə çox üstün oynadı və hesabı daha da artıra bilərdi. Müdafiəçilər Din Höysen (yayda “Bornmut”dan transfer olunub və debüt etdi) və Eder Militao uzaq məsafədən təhlükəli zərbələrlə Erreranı yoxladı.
Komandanın digər yeni futbolçuları — “Benfika”dan 43 milyon funt sterlinqə alınan sol cinah müdafiəçisi Alvaro Karreras və “River Pleyt”dən 38,5 milyon funt sterlinqə transfer olunan gənc yarımmüdafiəçi Franko Mastantuono da La Liqada ilk oyunlarına çıxdılar.
“Osasuna” isə qarşılaşmanın son dəqiqələrində futbolçusu Abel Bretonesi Qonsalo Qarsiyanı kobud oyuna görə qırmızı vərəqə ilə itirdi.
Real Madrid 1-0 Osasuna
Mbappe 51'
Qol: https://t.me/doxsanplus/106407
Bu qol həm də Mbappenin “Real Madrid”də 10 nömrəli forma ilə vurduğu ilk qol oldu.
Mövzu ilə bağlı Luka Modriç də fikirlərini bölüşüb:
“10 nömrə mənim üçün çox xüsusi idi, amma “Real Madrid” bu formanı Mbappəyə verməyi qərara aldı. Məncə, düzgün qərardır. Kilian dünyanın ən yaxşı oyunçularından biridir və dostumdur. Bu il çox yaxşı münasibət qurmuşuq və onun üçün sevinirəm”.
Mbappe daha əvvəl “Real Madrid”də 9 nömrəli forma ilə 43 qol vurmuşdu.
