"Lester Siti"nin yarımmüdafiəçisi Hamza Çoudri İngiltərə əvəzinə anasının doğulduğu ölkə olan Banqladeşi beynəlxalq səviyyədə təmsil etməyə qərar verdi.

90plus.az xəbər verir ki, Çoudri gənclər kateqoriyalarında İngiltərə millisinin formasını yeddi dəfə geyinməsinə baxmayaraq, İngiltərənin əsas milli komandasında çıxış etmək şansı qazanmayıb.

27 yaşlı futbolçu karyerasında yeni bir səhifə açaraq Banqladeşi təmsil etmək qərarını klubunun rəsmi sosial media hesabı vasitəsilə elan edib. "The Athletic"ə verdiyi açıqlamada, "Bu qərar uzun zamandır ağlımda idi. İngiltərənin gənclər komandalarında oynadım, lakin zamanla Banqladeşi təmsil etməyin mənim üçün daha mənalı olacağını anladım," deyə bildirib.

Banqladeş hazırda FIFA dünya reytinqində 185-ci yerdə qərarlaşıb və 2026 Dünya Kuboku seçmə mərhələsində öz qrupunda sonuncu olub. Lakin Çoudri Premyer Liqadakı təcrübəsini ölkənin futbol infrastrukturu inkişaf etdirmək və dünya reytinqində irəliləməsini təmin etmək üçün istifadə etməyi planlaşdırır.

Futbol sevgisini yaymağı hədəfləyir 

Çoudri Banqladeşdəki futbol azarkeşlərindən mütəmadi olaraq dəstək mesajları aldığını və bunun qərarına təsir etdiyini bildirib: "Banqladeş xalqı ilə çox yaxşı əlaqəm var. Futbol sahəsində istedadların inkişafına kömək edə biləcək bir infrastruktur yaratmağı ümid edirəm," deyə vurğulayıb.

Futbolun Banqladeşdə kriketdən sonra ən populyar idman növü olduğunu qeyd edən Çoudri, Avropada daha çox banqladeşli futbolçunun iştirak edə bilməsi üçün bir körpü yaratmağı hədəflədiyini bildirib. O, həmçinin gənc oyunçular üçün yeni yollar açmağı və ölkənin beynəlxalq səhnədəki yerini gücləndirməyi planlaşdırdığını əlavə edib.