“Barselona” bu mövsüm az oynayan və son vaxtlar zədələrlə mübarizə aparan Robert Levandovskinin müqaviləsini yeniləməyə hazırdır.
90plus.az xəbər verir ki, polşalı hücumçu gələn yay 38 yaşını tamamlayacaq. O, son həftələrdə bir neçə zədə problemi yaşasa da, son iki oyunda ehtiyatdan meydana çıxıb. Müqaviləsinin mövsümün sonunda başa çatması səbəbindən gələcəyi barədə klub daxilində müzakirələr gedir.
“Catalunya Radio”nun məlumatına görə, Levandovski “Barselona”nın paltardəyişmə otağında hələ də yüksək hörmətə sahibdir. Klub prezidenti Xoan Laporta da onu çox dəyərləndirənlər sırasındadır. Bununla belə, katalonlar müqaviləni yalnız o halda yeniləmək niyyətindədirlər ki, Levandovski maaşında ciddi endirimi qəbul etsin. Bu halda o, klubun ən çox qazanan futbolçuları siyahısından çıxarılacaq.
Əgər tərəflər maaş məsələsində razılığa gələ bilməsələr, “Barselona” təcrübəli hücumçunu azad buraxmağa və onun yerinə uzunmüddətli hücumçu axtarışına çıxmağa hazırdır.
Levandovski üçün mövsüm indiyədək uğursuz keçib – o, 11 oyunda cəmi 4 qol vurub. Əksər görüşlərə ehtiyat oyunçular skamyasından başlaması buna əsas səbəb kimi göstərilir. “Barselona”nın son vaxtlar hücumda yaşadığı çətinliklər isə komandanın bitirici hücumçuya ehtiyacını daha da artırıb — Levandovski isə tam formada olanda bu rolu yerinə yetirə biləcək əsas oyunçulardan biridir.
