Robert Levandovski “Barselona”dakı son ilinə fərqli yanaşma ilə hazırlaşır – o, artıq oyun vaxtından çox meydanda təsirli olmağı prioritet hesab edir.

90plus.az xəbər verir ki, polşalı ulduz futbolçu belə deyir:

“Bu il vəziyyətimə fərqli yanaşıram: oynadığım dəqiqələrin sayına o qədər də fokuslanmıram və mövsüm ərzində daim məsləhət edəcəyəm”.

“Mən həmçinin düşünmürəm ki, hökmən oynamaq məcburiyyətindəyəm. Heyətimiz rotasiya üçün imkan verir və bu, vacibdir. Bəzən dəqiqələrin çoxluğundan daha çox, keyfiyyətinə diqqət etmək önəmlidir”.

37 yaşlı hücumçu ötən mövsümü dəyərləndirərkən yorğunluq və zədə çətinliklərini də etiraf edib:

“Keçən mövsüm çox yüksək intensivliklə oyunlarda iştirak etdim. Elə anlar olurdu ki, özümü çox yorğun hiss edirdim, mövsümün sonuna yaxın isə zədələndim. Bu mövsüm daim vəziyyətimi analiz edəcəyik ki, ən vacib oyunlarda ən yaxşı formada olum”.

Levandovski həmçinin yeni mövsümün startı barədə danışaraq, kiçik fiziki problemlərin ilk çıxışlarına təsir etdiyini deyib:

“Özümüzü aldatmayaq, iki həftə zədəli idim. Amma mövsüm indi başlayıb, hələ çox uzundur. Mən dərhal maksimum dəqiqə oynamaq üçün təzyiq hiss etmirdim. Avqust sadəcə ritmə qayıtmaq ayıdır, amma hər şey əslində sentyabrdan başlayır. Mən də bilirdim ki, tələsmək lazım deyil”.

Çempionlar Liqası və La Liqadakı sıx təqvimlə bağlı qarşıda duran çətinliklərə toxunan polşalı futbolçu hazırlığın və istirahətin vacibliyini vurğulayıb:

“Biz bilirik ki, Çempionlar Liqası başladıqda oyunlar arasında çox az bərpa vaxtı olur, buna görə yorğunluğu idarə etmək çox vacib olacaq. Stilimizə görə intensivlik çox yüksəkdir, bu səbəbdən hər kəsin müəyyən vaxtlarda dincəlməsi lazım olacaq. Yayda çox yaxşı hazırlaşdım. Yetərincə istirahət etdim, özümü formada saxladım və düşünürəm ki, bu, mövsüm boyu mənə kömək edəcək”.