“Mundo Deportivo”nun məlumatına görə, əfsanəvi hücumçu Robert Levandovski karyerasını başa vurduqdan sonra ailəsi ilə birlikdə daimi olaraq Barselonada yaşamağı planlaşdırır.

90plus.az xəbər verir ki, polşalı futbolçu Kataloniyanın paytaxtını özünün əsl evi hesab edir.

Təcrübəli forvard “Barselona”da möhtəşəm iz qoyub. O, klubun heyətində keçirdiyi 192 oyunda 119 qol vurub. Dörd mövsüm ərzində komandanın 7 titul qazanmasına töhfə verən Levandovski bunların arasında 3 La Liqa çempionluğu da yaşayıb.

37 yaşlı hücumçu artıq İspaniya nəhəngindəki dövrünü başa vurmağın vaxtının çatdığına qərar verib. O, klubdan ayrılarkən 60 min azarkeş, komanda yoldaşları və məşqçilər korpusu tərəfindən emosional şəkildə yola salınıb.

Robert Levandovski karyerasını davam etdirmək üçün Səudiyyə Ərəbistanına yollansa da, uzunmüddətli gələcəyini yenə İspaniya ilə bağlayır. Onun həyat yoldaşı Anna artıq Barselonada idman zalı idarə edir.

Məlumata görə, futbolçunun növbəti müqaviləsi başa çatdıqdan sonra ailə yenidən Aralıq dənizi sahilində yerləşən evinə qayıdacaq. Levandovskinin Barselona ilə qurduğu dərin bağın futbolçu karyerası bitdikdən sonra da davam edəcəyi bildirilir.