“Qarabağ”ın 15 yaşlı futbolçusu Fransa klubunun diqqətində!
90plus.az xəbər verir ki, “Qarabağ”ın 15 yaşlı futbolçusu Əli Bəşirov son dövrlərdə göstərdiyi oyunla diqqət mərkəzinə düşüb. Gənc yarımmüdafiəçi yaşının az olmasına baxmayaraq, artıq əsas komandanın məşqlərinə də cəlb olunub.
Qış fasiləsində “Qarabağ”ın baş məşqçisi Qurban Qurbanov onu komandanın Türkiyənin Antalya şəhərində keçirilən təlim-məşq toplanışına aparıb. Hücumameyilli yarımmüdafiəçinin məşqlərdəki performansı mütəxəssislərin diqqətini çəkib.
Əli Bəşirov eyni zamanda Azərbaycanın U-18 millisinin də üzvüdür. O, yaxın vaxtlarda Belarusda təşkil olunan Beynəlxalq İnkişaf Turnirində iştirak edib və turnirdə vurduğu gözəl qolla yadda qalıb.
Gənc futbolçunun çıxışı artıq xarici klubların da marağına səbəb olub. Məlumata görə, o, Fransanın “Strasbur” klubunun diqqətini cəlb edib. Hətta yarımmüdafiəçi Liqa-1 təmsilçisinin baxışına dəvət alıb.
Bildirilir ki, Əli Bəşirov may ayında Fransaya yollanacaq və “Strasbur”un düşərgəsində 10-15 günlük baxışdan keçəcək. Onun əsasən klubun gənclərdən ibarət komandası ilə məşq edəcəyi gözlənilir.
Əgər gənc futbolçu baxış zamanı özünü doğrultsa, yeni mövsümdən karyerasını Fransada davam etdirmək imkanı əldə edə bilər.
Mənbə: Qol.az
